Промоција на Стратегијата за културен развој на Пелагонискиот плански регион 2013 – 2016

На 04.12.2013 во просториите на Центарот за развој на Пелагониски плански регион се одржа промоција на Стратегијата за културен развој на Пелагонискиот плански регион 2013 – 2016. Промоцијата ја организираа Центарот за развој на Пелагониски плански регион и Локомотива  – Центар за нови иницијативи во уметноста и културата.

На истата присутни беа членовите на Мрежата за развој на културата во Пелагонискиот регион.
Стратегијата за културен развој на Пелагонискиот регион 2013 – 2016 се реализира во рамки на работата на оската за културни политики од Програмата за децентрализирана соработка помеѓу регионот Долна Нормандија и Република Македонија.
Програмата е финансиски поддржана од страна на Министерството за надворешни работи на Република Франција и е координирана од страна на Асоцијацијата на агенции за локална демократија АЛДА.
Визијата на Стратегијата е Пелагонискиот регион е европска културна и туристичка дестинација, каде културата е ресурс на знаење и иновација, кој придонесува за социјална интеграција и економски развој, додека мисијата на Стратегијата е Регионално поврзување на културните чинители и жителите на заедниците заради промоција на културниот идентитет, наследството и туризмот во Пелагонискиот регион, преку искористување и јакнење на неговите капацитети и содржини.
Стратешки цели за развој на културата во Пелагонија согласно Стратегијата за развој се :
1.    Развој на професионални капацитети
2.    Развој на локалните културни политики
3.    Вмрежување и развој на меѓуопштинската и интернационална соработка
4.    Интерсекторска соработка и развој на културен туризам.

Партнери на оската за културни политики се Локомотива – Центар за нови иницијативи во уметноста и културата (Македонија) и областа на заливот Мон Сен Мишел (Долна Нормандија). Локален партнер на Локомотива во реализирање на активностите на оската за културни политики е Центарот за развој на Пелагонискиот плански регион. Стратегијата за културен развој на Пелагонискиот плански регион 2013 – 2016 е достапна за симнување на страната на Центарот за развој на Пелагониски плански регион www.pelagonijaregion.mk